Chai ki ek garam pyaali labon ki muntazir aur qalamkār ka saath dene mukammal taur par taiyaar thi. Chaudhvin ka chand apne shabab par tha. Aaj kuch likhne ka dil bhi bohat chah raha tha. Zehen ke do hisson mai mauzu ko bias-e-behes bana kar tabadla-e-khayal hone laga. Iss pur-asar guftagu ke daurān alfaz aap hee khud ko jumlon mai pirone lage. Unhe koi mauzu darkaar toh nahi hota. Dil ko qalam se rabt karne ki āas ho bas..ek khaas ehsaas aur ek chai ki wahi garam pyaali jisne nah jaane kitni aur kahaniyon main, ghazlon main, nazmon main apna kirdaar bakhubi nibhāya hai. Nah jaane kitney khayalaat ko alfaz, aur alfaz ko asha’ar mai tabdeel hote dekha hai. Chai ki wahi ab neem-garam pyaali. 

-Nimra Vizarath